Qodobaddii ay ka hadleen golaha wasiirrada Somaliland shirkoodii maanta, halkan ka akhriso.

Madaxtooyada Somaliland ayaa baahisay fadhigii 61aad ee golaha wasiirrada oo lagaga hadlay qodobbo muhiim ah, Saab TV oo helay warsaxaafadeedka ay madaxtooyadu baahisay, ayaa u dhignaa sida tan:

”Fadhigii 61aad ee golaha wasiirrada Jamhuuriyadda Somaliland ku yeeshay habka Maqalka iyo Muuqaalka (Video Conference) oo uu shir-guddoominayey Madaxweynaha Jamhuuriyadda Somaliland, Mudane Muuse Biixi Cabdi, kuna wehelinaayey Madaxweyne Ku xigeenka Jamhuuriyadda Somaliland, Mudane Cabdiraxmaan Cabdilaahi Ismaaciil (Saylici) waxa golaha lagaga hadlay xaaladda guud ee waxbaradshada dalka, shaqaalaha aan joogtada ahayn ee ka hawlgala hay’adaha kala duwan ee dawladda, waxa kale oo goluhu dood ka yeeshay xeerka shaqaalaha dawladda iyo siyaasadda qaran ee shaqo abuurka Somaliland.

Ugu horrayn wasiirka wasaaradda waxbarashada iyo sayniska, ayaa golaha warbixin ka siiyey heerka waxbarashada dalku ay marayso iyo sidoo kale himilooyinka waxbarashada ee ku qotoma maamul daadejinta waxbarashada, tayeynta waxbarshada iyo fidinta waxbarshada ee dalka oo dhan. Wasiirku waxa uu xusay in 1,516 (kun, shan boqol iyo lix iyo toban) degsiimo oo ay Somaliland ka kooban tahay 620 (lix boqol iyo labaatan) degsiimo oo u dhigma boqolkiiba afartan (40%) aanay lahayn adeegga waxbarashada ee Aas-aasiga ah waxana uu tilmaamay in saddexda sanno ee soo socda ay wasaaradda u qorshayshan tahay in ay degsiimooyinkaas ku fidiso adeegyada waxbasashada, dhanka kale waxa uu sheegay in ay ku hawlan yihiin daadejinta maamulka waxbarashada guud ahaan dalka oo dhan.

Wasiirku waxa uu xusay in ay ku guda jiraan tayaynta heerarka kala duwan ee waxbarshada isagoo xusay inay bilaabeen tayaynta Jaamacadaha dawliga ah, sidoo kalana ay qorshe u sameeyeen tayaynta Jaamacadaha gaarka loo leeyahay.

Sidoo kale, Golaha Wasiirrada Jamhuuriyadda Somaliland ayaa go’aamiyey dhaqan gelinta go’aamada ay golaha u soo jeediyeen guddi uu hoggaaminayey Madaxweyne ku-xigeenka Jamhuuriyadda Somaliland oo ka koobnayd Toddoba wasiir iyo guddoomiyaha hay’adda shaqaalaha dawladda, kuwaas oo hore loogu xilsaaray inay go’aan kama danbays ah ka soo gaadhaan qaabka loo maaraynayo shaqaalaha ku meel-gaadhka ah ee ka hawlgala hay’adaha kala duwan ee dawladda, qodobadaas oo dhignaa sidan:

1. In tirada Shaqaalaha ku meel-gaadhka ah ee ku jiray warbixintii Hay’adda shaqaaluhu la wadaagtay Golaha wasiirrada oo dhammayd 1,009 (kun iyo sagaal) qof qof kana kooban 19 wasaaradood iyo 9 Hay’adood ay madax-taabasho, qiimayn iyo hubin ku soo samayso soona saarto liis kama danbays ah oo rasmiya.

2. In xubnaha ku soo baxa liiska rasmiga ah ee shaqaalaha ku meel-gaadhka ah loo aqoonsado inay yihiin xubno shaqo carbin (Internship) kula shaqaynaya wasaaradaha iyo hay’adaha ay ka tirsan yihiin sidaasna ku diiwaan-geliso si ku meel-gaadh ah Hay’ada Shaqaalaha Dawladu sanadkan 2020.

3. In iyadoo loo raacayo sida uu dhigayo habraaca sharci ee shaqo qorista iyo xulista ee Hay’adda shaqaalaha dawladdu ay dhammaan xubnaha shaqo carbinta loo diiwaangliyay lagu soo daro miisaaniyada 2021, iyadoo wasaarad iyo hay’ad kastaa tirada rasmiga ah ee ay u diiwaangelisay Hay’ada shaqaaalaha dawladu ku soo darsanayao oddoroska miisaaniyadda ay sanadka 2021.

4. Wasaaradaha caafimaadka iyo Waxbarashada oo aan tirada shaqaalaha ku meel-gaadhka ah ee qodobka 1aad ku cad ku jirin, kuwaas oo aan liisaskooda soo gudbin, waxaa la go’aamiyay in dib loo dhigo, loona qaybiyo 2 sanno oo is xiga, maaddaama tiradoodu badan tahay laga bilaabo sannadka 2023 ilaa 2024-ka.

5. Waxa si rasmiya gebi ahaanba loo joojiyay lana madnuucay qaadashada xubno kumeel gaadh ahaan wasaaradaha iyo Hay’adaha Dawlada ku hawl-geliyaan sifo kasta oo ay tahay. Wasaaradda ama Hay’adda go’aankan ka dib qaadata shaqaale kumeel-gaadh ah waxa loo aqoonsanayaa sharci darro baalmarsan xeerarka shaqaalaha.

Ugu danbayn golaha wasiirada Jamhuuriyadda Somaliland ayaa cod aqlabiyad ah ku ansixiyey xeerka Shaqaalaha Dawladda oo kaabis iyo wax ka beddel lagu sameeyey, sidoo kale waxa uu goluhu dib u dhigay doodda Siyaasadda Qaran ee Shaqo abuurka Somaliland oo wasaaradda Shaqo-gelinta Arrimaha Bulshada iyo Qoyska ay golaha hor keentay.”

Wararkii ugu dambeeyay kala soco Saab TV, goor kasta iyo goob kasta.

Ahmed Mohamud

Share
Published by
Ahmed Mohamud

Recent Posts

Dalka Jabuuti oo Tijaabiyey Dayax-gacmeedkii u horeeyey

Dalka Jabuuti ayaa hawada sare u dirtay Dayax-gacmeedkeedii ugu horeeyay ee uu dalkaasi yeesho, kaas…

6 months ago

Madaxweynaha Soomaaliya oo ka Hadlay Mawqifkooda Dagaalka Gaza

Madaxweynaha Soomaaliya Md. Xasan Sheekh Maxamuud ayaa magaalada Riyaad ee Boqortooyada Sucuudiga kaga qeyb-galay kulan…

6 months ago

Itoobiya oo Mar kale Caddaysay sida ay u Doonayso inay Bad ku hesho

Xukuumadda Itoobiya ayaa sheegtay in qorshaha ay dawlad ahaan ku doonayaan inay heleen meel ay…

6 months ago

Ajandaha Golaha Guurtida iyo qodobada xaasaasi ah ee ku jira

Ajandaha kal-fadhiga 83aad ee Golaha Guurtida Somaliland oo ka kooban 12 qodob, ayaa waxa ku…

6 months ago

Madaxweynaha Somaliland oo ka Qaybgalay 30-Guurada Kasoo Wareegtay Aas-Aaskii Ciidanka Booliska.

Madaxweynaha Jamhuuriyadda Somaliland Md. Muuse Biixi Cabdi, ayaa ka qayb-galay munaasibad ballaadhan oo loogu dabbaaldegayo…

6 months ago

Somaliland oo maanta Xukun Dil ah ku Fulisay Shan Nin oo lagu helay dambiyo ah inay hore dilal uga gaysteen gudaha dalka

Dawladda Somaliland ayaa subaxnimadii hore ee maanta xukun dil ah ku fulisay shan nin oo…

6 months ago