Maraykanka oo xusay weerarkii argagixiso ee ugu xumaa ee lala beegsado

Wuxuu ahaa weerarkii ugu waynaa ee argagixiso, ee lagu soo qaado ciidda Maraykanka, sida ay dawladda Maraykanku sheegtay, dad badan, oo kamid ah dadwaynaha Maraykanka, ayaa maalintaa mooday in dalkoodii dunida ugu xoogga waynaa dal kale dibadda kasoo weeraray.

Weerarradii 11-kii September, sannadkii 2001, lagu qaaday Maraykanka, ayaa bedelay guud ahaan dunida oo dhan, dad ku dhow 3000 oo qof, ayaa naftooda ku waayay, halka ay 6000 oo kalena ku dhaawacmeen, khasaaraha maaliyadeed, ayaa lagu qiyaasay illaa 10 Malyuun oo dollar. 

Afar diyaaradaha rakaabka ah, oo ay kala lahaayeen shirkadaha United Airlines iyo American Airlines, kuwaasoo ka kacay waqooyi-bari Maraykanka, ayay afduubeed 19 af-duube.

Duulimaadyadii kala ahaa American Airlines 11 iyo United Airlines 175, ayaa kala duqeeyay saraha dhaadheer ee waqooyi iyo koonfur ku kala yaal xarunta ganacsiga adduunka.

Telefishannada dunida, ayaa si toos ah looga arkayay saraha dhaadheer oo qiiqaya, dabadeed dumaya.

Maraykanka, ayaa weerarradan ku eedeeyay kooxda Alqaacida, isagoo bilaabay weerarro uu ugu yeedhay aragagixiso la dagaallan, dagaalladan, ayaa  sababay geerida dad badan oo aan waxba galabsan iyo burburka dalalk dhisnaa, kuwaas oo uu Maraykanku ku eedeeyay inay gacan siin jireen kooxda Alqaacida.

Maanta, ayaa Maraykanka laga xusayaa 18 sanno guuradii kasoo wareegtay weerarradaas, iyada oo madaxwayne Trump uu aqalka cad ku xusi doono daqiiqado aamusnaan ah, kahor inta aanu xarunta wasaaradda gaashaandhigga ee Pentagon oo kamid ahayd meelihii la weeraray berigaas aanu kula kulmin ehellada dadkii lagu laayay.

Halka ay dadkii ku dhaawacmay iyo ehellada dadkii ku dhintayna ay iskugu soo ururi doonaan Ground Zero, oo ah goobtii lagu burburiyay daarihii dhaadheeraa ee xarunta ganacsiga adduunka.

Axmed Maxamuud Yuusuf, Telefishanka Saab, Hargeysa.