Dhaqaale burburka ka jira dunida ayaa ah kii ugu xumaa ee muddo qarni ah ama 100 sanno ka dhaca caalamka, sida uu ku waramay ururka caalamiga ah ee is-kaashiga dhaqaalaha iyo horumarka ee marka magaciisa lasoo gaabiyo loo yaqaano, OECD.
Ururkan fadhigiisu yahay magaalada Paris ayaa xusay in sanadkan uu dhaqaalaha dunidu hoos u dhici doono 6%, ka hor sanadka 2021-ka oo isagana la saadaalinayo in saamaynat dhaqaale-xumo ay sii jiitami doonto.
Xanuunka dunida aafeeyay ee Covid-19 ayaa keenay dhaqaale burburkan baaxadda leh ee ay wajahayaan wadamada calanka u sida dhaqaalaha dunida.
Ururka is-kaashiga dhaqaalaha iyo horumarka ayaa sidoo kale sheegay in hadii xanuunka Covid-19 uu sii jiro ama weji kale oo fiditaan ah yeesho uu dhaqaaluhu mar kale liici doono xaddi aan hore loo arag.
Bangiga Adduunka ayaa hore u saadaaliyay in in sanadkan 2020 uu dhaqaalaha dunidu is-dhimi doono 5.2% halka hay’adda IMF ee lacagta duniduna ay saadaalisay 3%.
Wadamada la filayo in saamaynta wayni ay soo gaadho waxa ka mid ah dalka Ingiriiska.