Maanta oo Jimce ma jirin diyaarado ka soo degay garoonka diyaaradaha magaalada Hargeysa, waxaana istaagtay shaqadii madaarka ka socotay.
Diyaaradda ETHIOPIAN Airlines, oo la filayay in ay maanta soo caga-dhigato garoonka ayaan iman, iyada oo rakaabkii raaci lahaana la sheegay in ay ka gudbayeen magaalada xuduudda ku taalla ee Wajaalle.
Rakaabka, ayaa diyaarada ka raaci doona magaalada Jig-jiga ee deegaanka Soomaalida oo ay ugu sii gudbin doonaan caasimadda Itoobiya ee Addis Ababa.
Waxaa jiray warar maanta lagu baahiyay baraha bulshada oo lagu sheegay in ay ETHIOPIAN Airlines ay ka soo degtay garoonka, laakiin warar xog ogogaal, ayaa u sheegay Telefishanka Saab TV, in aanay jirin wax diyaarad ah oo maanta madaarka soo fadhiisatay.
Maalintii shalay ayey ahayd markii hawadda laga celiyay diyaarada Fly Dubai oo ka degi lahayd Hargeysa .
Diyaarada ETHIOPIAN Airlines, ayaan iyana shalay ka soo degin madaarka Hargeysa , waxaana rakaabkii ay qaadi lahaayeen labada diyaaradood ay xalay ku hoydeen Hargeysa .
Xukuumada Somaliland weli kama hadal sababta labada shirkadood u joojiyeen duulimaadyadoodii Hargeysa .
Dawladda federal-ka Soomaaliya oo sannadkii hore si rasmi ah ula wareegtay maamulka hawada sare, ayaa toddobaadkan ku dhawaaqday go’aan ay ku joojisay dhammaan duulimaadyada caalamiga si looga hortago fiditaanka xanuunka Coronavirus , iyada oo go’aanka shalay hirgalayey.
