Dalka Soomaaliya ayaa gaadhay marxalad muhiim ah oo dhabaha u xaadhaysa in laga dhaafo daynta balaayiinka dollar ah ee lagu leeyahay dalka.
War ay si wada jira u soo saareen Bangiga Adduunka iyo hay’adda lacagta ee IMF ayaa lagu sheegay in Soomaaliya ay u hadhsantahay marxaladda dhammaystirka oo kaliya (completion point) taas oo muddo saddex sanno ah qaadan karta.
Raysalwasaaraha xukuumadda federaalka Soomaaliya, Xasan Cali Khayre, ayaa soo dhaweeyay marxaladan uu dalkiisu gaadhay, isagoo u mahadceliyay dadka Soomaaliyeed, madaxda Bangiga Adduunka iyo IMF iyo guud ahaan cid kasta oo ka qayb qaadatay hawshan adag.
Hadii Soomaaliya daynta laga cafiyo waxay awood u heli doontaa in ay dalkeeda ka dhisto dhanka dhaqaalaha, waxay heli doontaa maalgalino caalami ah, iyadoo la macaamili karta hay’adaha dhaqaalaha ee kala duwan.