War kasoo baxay wasaaradda gaashaandhigga ee dalka Maraykanka ayaa lagu sheegay in aanay Maraykanka u qorshaysnayn in uu ka baxo gudaha waddanka Ciraaq.
Warkan ayaa imanaya xili la isla dhex marayay in maalmaha soo socda uu Maraykanku bilaabayo in uu daad-gureeyo ciidamadiisa ku sugan gudaha Ciraaq.
Pentagon-ku waxay xustay in aanay jirin meel ay uga aag-bedelanayaan Ciraaq.
Sarkaalka ugu sareeya ciidamada Maraykanka ee Ciraaq ayaa dalbaday in uu ciidamada ka bedelo goobta ay degenyihiin si ay marka danbana u qorsheeyaan bixitaan rasmi ah.
Warqadda oo ay warbaahintu aragtay ayuu Jeneraalku sidoo kale kaga codsaday waaxda gaashaandhigga in ciidamada Ciraaq laga saaro, maadaama ay baarlamanka Ciraaq u sheegeen in ay si kama-dambays ah u baxaan.
Xiisadda gobolka Bariga Dhexe ayaa kacsan wixii ka danbeeyay dilkii Jeneraal Qaasim Sulaymaani, xili la filayo weeraro ay Iran ku qaado goobaha Ameerikaan ee Bariga Dhexe.
