Rasaas ayaa laga maqlay saldhig ciidan oo u dhow magaalada Bamako ee caasimadda waddanka Maali, maalintii Salaasadii.
Safaaradda Norway ee dalka Maali, ayaa sheegtay shakiga in rasaastaasi ay ahayd ‘’gadood-ciidan’’ xilli ay gobolkaasi ka socdaan qalalaase siyaasadeed.
Wararka ka yimi Maali, ayaa sheegay in ciidamadu ay rasaasta u ridayeen cirka, saldhigga Militari oo ku yaalla magaalada Kati, taas oo qiyaastii 15 Km amaba 9 Mile u jirta caasimadda Bamako.
Goobjoogeyaal ayaa warbaahinta u sheegay inay arkeed taangiyada iyo baabuurta gaashaaman ee ciidamada oo dhex taagan waddooyinka magaalada Kati, iyadoo wakaaladda wararka ee Associated Press-na sheegtay in afhayeen u hadlay ciidamadu uu u xaqiijiyay jiritaanka warkaasi, balse aanu faahfaahin ka bixin.
Safaaradda Norway ee dalka Mali, ayaa muwaadiniinteeda ku boorrisay taxadar dheeri ah, safaaraddu waxay muwaadiniintooda u sheegtay suurtagalnimada kacdoon-ciidan iyo inay guryaha ku sugnaadaan.
Farriin ay safaaradda Faransiisku u dirtay muwaadiniinteeda Salaasadii, ayay ugu sheegtay inay guryaha ku jiraan.
Quwadaha gobolka ayaa ka warwarsan xaaladda Mali iyo inay xasillooni darraadaasi sababi karto rabshado daba dheeraada.
Sannadkii 2012-kii, kacdoon Military oo ka dhacay saldhigga, ayaa xilka lagaga tuuray madaxwaynihii Mali Amadou Toumani Toure.
