Ugu yaraan 19 qof ayaa ku dhintey in kabadan halka 600 oo kalena ay ku dhaawacmeen bariga dalka Turkiga, ka dib dhulgariir ka dhacay fiidnimadii jimcaha, sida ay sheegeen masuuliyiintu dalkaasi.
Dhul gariirka, oo cabbirkiisu ahaa 6.7, ayaa ka dhacay meel u dhaw magaalada Sivrice, ee bariga gobolka Elazig, halkaas oo ay ku burbureen ugu yaraan 10 dhisme, wasiirka arrimaha gudaha ee Turkiga Sulyman Soylu ayaa sidaas warbaahinta u xaqiijiyay.
Muuqaal ay baahisay Warbaahinta IHA ee Turkiga ayaa muujinayay shaqaalaha gurmadka degdegga ah ee badbaadinaya dadka ku dhaawacmay dhismeyaasha dumay.
Hawlgallada goobidda iyo badbaadinta ayaa weli socda iyadoo qiyaastii 30 qof la layahay illaa hadda sida uu sheegay wasiirka arrimaha gudaha Turkigu.
Madaxwaynaha Turkiga Erdogan, ayaa sheegay inay samaynaayaan wax walba si hoos loogu dhigo khasaaraha dhimasho iyo hantiyeed ee uu dhulgariirku sababay.
Laamaha gurmadka degdegga ah ayaa si adag u shaqaynaya iyadoo la geliyay heegan buuxa.
Axmed Maxamuud Yuusuf, Telefishanka Saab, Hargeysa.
